Tusi mo le Afioga Kovana Lolo Moliga

Lau afioga ile Kovana Sili, Lolo Moliga.

Fa’atalofa atu i le aso paia lenei ole Ali’i. Malie maia lou finagalo tamali’i, talosaga atu i le agaga maualalo ma le fa’aaloalo tele, fa’afo’i atu matou o ou tagata nu’u. Ua atoa nei le fitu masina o tu’ulafoaiina mai matou. O lo’o outou silafia auala e mafai ona fa’atino ai lenei fa’amoemoe. O le tumutumuga i o matou loto ia aua ne’i o’o atu lenei fa’ama’i isi o tatou atunu’u, e pele io matou loto.

Talosaga atu tatou galulue fa’atasi, ae maise lo tatou fa’atuatua ma fa’amoemoe ile Atua, aua e leai se mea e faigata ia te Ia. E mafaia mea uma i lona fa’atasi mai. O Iesu lava na fetalai, a iai se mea tatou te manana’o ai, tatou ole atu ia te Ia ona foaiina mai lea. O lo tatou Atua, e alofa mutimutivale, nate le tu’ulafoaiina fo’i i tatou i taimi uma ma aso uma seia o’o lava ile gataaga.

Ua fai lava ma avega mamafa le tagitagi mai pea o nai o matou Tinā ma Tamā matutua ile ao male po i le fia fo’i atu. 😭 😭 Amuia oe ua fai i lagi le tuligasi’a a nai ou matua, tulou lava, (May they rest in God’s love); a’o nisi o matou o loo tausi pea nai matua. Nutimomoia lava le loto i le alolofa iai. Ae maise fo’i o nai fanau iti, o lo’o faatali mai i’ina. O lo’o pologa foi latou ile fia mafuta mai i o latou matua.

O oe lava o le Tamā o le Atunu’u. Matou te malu i ou aao alofa. A tagi atu lou atalii ise mea e mana’o iai…ete avatu ea iai ni ma’a? Leai ete tali iai i lona mana’o aua o oe ole Tamā alofa. E le’i so’ona valaauina oe e le Atua, aua o oe e fa’amuamua lava lou alofa i ou tagata.

Fai mai Peteru ia Iesū, “Le Ali’i e, o ai ea a matou o iai, o ia te oe upu ole ola.” Lau afioga e i le Tama o le atunu’u, o ou aao alofa o lo’o iai lo matou ola. Ua na’o oe lava lo matou sulufaiga. Ua matou matitiva iinei, pologa ma matelāina. Taugata tele le soifuaga i nei atunu’u. O tupe lava mea uma. Ua matou fia fo’i atu i nai matou fanau ma aiga fa’amolemole. Mata’utia le oona ma matuitui o le valavala ma nai fanau iti. Maligi lava loimata i le ao male po. Ua fitu lenei o masina. Talia maia le tagitagi ma le talosaga atu a ou tagatanu’u. Avatu fo’i malu i pu’ega pe afai ua iai se upu ua sala i lau fa’afofoga. Fa’amagalo le auauna fa’atauva’a.

Alofa le Atua, foa’i atu le tumu fa’a-le-Agaga e musumusuina ai pea oe aua le faia o fa’aiuga tonu ma le alofa mo tagatanu’u uma i’ina isi o tatou atunu’u, fa’apea fo’i matou o lo’o tagi-mai-ala. Manuia tele faiva ma tiute feagai ai lau afioga.

Manuia tele le aso paia o le Alii.

Soifua ma ia manuia tele lau afioga le Tama ole Atunu’u.

Ma le agaga maualalo ma le fa’aaloalo tele,

Vui Florence Saulo