Susuga I le Faatonu,
I le ava ma le migao e tatau ai, oute faatulou atu i le Pa’ia ma le mamalu o ou Sa ma Faiga Samoa, oe le Ao mamala, ou te tiu ai i le vasaloloa. Viia le Atua o le lagi ma le lalolagi ma mea o tumu ai, ae maise le Faavae Pa’ia o tatou malo e lua. Amene.
Peita’i, ua laga se leo vaivai, (ae pule alofa Lona Mana lilo e fesoasoani mai) ona o se noanoataga ua faate’ia ai le loto, i le tuu eseese o tagata-nuu poo sitiseni o le tatou motu nei o Tutuila ma Manu’a, ma faasa nisi ona ulufale atu i le Fale o le malo tele o le (E.O.B.), pe a leai se faamaoniaga mai le Department of Health (D.O.H) e ta’u atu ai, e le o maua lena tagata i le Koviti. O le faamatalaga lea mai se tusi a le Ao o le malo, le Susuga a le Kovana ia Peleti Mauga i le aso 14 o Aperila, 2022.
Ma le faanoanoa tele, ua molia e nisi o tama fanau o le ele’ele, o e na o atu ma pepa faamaonia, sa le aloaia a latou faamaoniaga; ae o loo faamalosia lava le tala lea, “a le faia ni tui, e le faataga i totonu o lenei fale o le E.O.B!” O lona uiga ua le aloa’ia tusitusiga ua uma ona faata’oto e le Susuga a le Ao o le malo!
A o le Fono fo’i, poo fea o iai? Ua matua leai ni telefoni poo ni ofisa e maua ai a latou susuga mo se leo taumomoli o tagata palota o sitiseni! Talofa e, o fea a sulu iai tagata-nuu mai nei noanoataga? A o fea ‘ea le va fealoa’i o lala e tolu o le malo, e tatau ona tula’i mai ma faatino manaoga o tagata o le atunuu e tusa ai ma o latou tiute na tauto ai i luga o le Tusi Sa?
I le ma lea, i taimi faigata o loo ua tatou iai, i le tele o le maliu ma le oti, ua moomia e tagata-nuu, le filemu e faamama i faanoanoaga o aiga, ae le o le popole vale poo fea le mea o le a sulufa’i iai i lea faalavelave ma ia ituaiga faasea ua ova?
Mo le silafia, o setete uma o le malo tele o Amerika, e lautele i maila e selauafe ma afe, ma to’atele atu i loo le 50,000+ o tagata o Amerika Samoa, e leai leai lava ni faasasa faapenei, e vavae ese ai tagata- nuu ae maise i totonu o le Fale Pa’epa’e o le laumua i Uosinitone o Amerika! O le fesili, o ai lo tatou malo ititi e i lalo o le malo o Amerika ma nei ituaiga tulafono le tutusa, tulou!
I nisi o setete e faapei o Florida, Texas, Montana, Arizona, etc., ua tatala le faamalosia o “masks”, poo ‘ie’ie e pupuni ai fofoga, o isu ma gutu o tagata lautele, se’i tulou.
Ae faapefea kamupani vaalele e fia ua faaleaogaina lea tulaga ma ua ave ese uma nei saisaitiaga?
Se mea ina a faigata o le tau to’atasi o se taua (faaleagaga) e momoli atu ai se leo mo se sa’olotoga o tagata-nuu. Ae o loo tatalo pea lava pea le to’atele o ana auauna Faifeau, Sui faifeau, Sea, ma Fesoasoani, Patele, Pisupo, Evagelia ma soo se ituaiga faalagiga, o loo punonou pea i tatalo i le ao ma le po, ae ua gugu o latou lau fofoga ma pupuni o latou mata e aunoa ma le tutu mai e saunoa mo le lautele o tagata ua fia maua se mapusaga! Ua tusia, LE TAGATA VALEA AE, E TE LEILOA EA UA MATE LAVA LE FAATUATUA PE A LEAI NI GALUEGA? (Iakopo 2:20) Amene.
Ae faai’u le tagi o lo’u nei fatu i le leai o se tula’i mai o le malosi ole pule’aga a nuu ma itumalo ona ua tele naua Suafa o aiga ma alalafaga e le o nofo’ia! E moomia tama fanau o toto ma aano o aiga. Ae a pe a faataga tama teine e fesoasoani atu ma nonofo mai i o latou faasinomaga?
E le tonu ma sa’o le nonofo mai o tagata le tau toto faapei o faiava i o latou suafa! Ua tuu tia’i measina a aiga ma ave ese atu mai le toto moni o lea suafa ma lea suafa!
Ma le ava e tatau ai, e ta’ita’i lava e le Motu Sa le faasasa o tama fafine. Ma le ava tele, Tutuila ma Manu’a, oe le atunuu e ta’ua ua Kerisiano, ua tatala le lagi ua taulia ma o’o atu ai nuu-ese i le faataga I le lagi! O i tatou lena, mo lo tatou sa’olotoga lea na totogi e Iesu le Faaola i lona toto le pona! O ai i tatou o loo tatou faatautau ai pea le Alo o le Atua Soifua i luga o le satauro i le mataupu lea?
A fai le valaau a le Atua i le lagi, e leai se laina faapitoa i luga e muamua atu ai Faifeau, Faipule, Matai, etc., o ta’umai e Lana Tusi Pa’ia! Ua na’o e ua faamama i le toto manumalo o Lona Alo pele e to’atasi, o le ua talitonu atu ia te Ia.
Amuia le saofa’iga a Tumua ma Pule ua taliaina ai tama fafine a o latou aiga? A lea ua pale mai le Palemia fou o le Tama’ta’! E moni lava ua e see i le manuia o le Tama Pa’ia, le Faavae o lou malo tu to’atasi! Lau pule lea, Tumua ma pule!
Ae paga lenei mea o le tele o faasasa I lea mea ma lea mea i Tutuila nei ma le Manu’atele, ae ta’imua e nuu oute sau mai ai: i afioaaga i Nuuuli, Ili’ili, Futiga, Leone, aemaise Nua&Seetaga.
Soifua ma manu teleina lau faasausauga Samoa. Ma le faaaloalo tele, E AU LAVA LE ‘INA’LAU A TAMA’ITA’I. I le Suafa o le Tama, Alo, ma le Agaga Paia
Fatumalala Leulua’i A.
Tama fafine ole lauele’ele.
