Susuga a le Faatonu
E tatau ma onomea le faamua o le viiga i le Tama oi le Lagi, ona o le ola ma le malosi ua tatou mauaina e tautua ai galuega tatau, o loo faia i le lalolagi e faapei ona faia i le lagi, e tusa ai ma lona finagalo, amene.
Faafetai tele i lou tali leleia o lenei sulufa’iga ua leva ona o’u onosa’ia i le tele o tausaga, ae faasaga i le tatou Fono mamalu o Amerika Samoa. O lau pule lea, tulouna.
Ma le ava tele, o a’u o se sitiseni o lenei laueleele, peita’i, o se faanoanoaga tele i le loto, ona ou te leiloa pe faapefea ona faaali ni manatu e fia faaleo atu i totonu o le Fono, pe a le taaalo ni faapotopotoga e soalaupule ai tagata-nuu i totonu o nu’u ma alalafaga ta’itasi ma o latou faipule faapea senatoa, aua o i latou o le leo faao’o o sitiseni i totonu o le maota o le Fale Fono faitulafono o le malo o Amerika Samoa!!!
Mo le silafia o le tagata palota, e moomia lana faasoa i lona Sui i le maota Fono ina ia faia o le tiute o lona Faipule e faaali le finagalo ma mana’oga o lona itumalo. Peita’i, e faate’ia le vaai i le faitau atu i luga o le Samoa news poo le Talanei, ua pasia lea pili ma lea pili e aunoa ma le iloa e le lautele po’o ana fea na fai ai nei aiaiga ma nei mataupu?
E faapea lo’u itumalo o le Alataua, o le ala lava lea sa sau mai ai i le tele o tausaga ua mavae atu se’ia o’o mai i le taimi nei.
I le ma lea, e leai ni ofisa e maua ai Susuga a faipule ona o loo fauina le Fale Fono fou. O le fesili, o fea la e su’e aga’i iai a outou Susuga? Afai e le o mautinoa pe o afea e uma ai le fauina o lea Fale, e faapena fo’i le umi o le leai o ni tou ofisa! E le talafeagai ona savalia o outou maota ma laoa ona o lo outou taimi faapitoa lena ma o outou aiga! Ae a pe a ave seisi vaega tupe o a outou totogi lea na sii, e faatino ai lenei mana’oga taua?
O le mea ua aliali mai, ua matua leai lava se sootaga ma a outou susuga!!! Peisea’i, ua na o le taimi lava o le palota e vaai ai o outou foliga lalelei, ae maise le tuuina mai o tou numera telefoni. Ae na o na uma lava o le palota, leai se talia o tou telefoni, ua ta pe mai. O lea la le a’ano tonu o le galuega na palotaina ai nei sui mo nei nofoa i le fale maualuga o le Senate ma le Fale maualalo i le Faipule? Se mea i na a le tusa ai ma a outou tautoga i luma o le atunuu aemaise le Atua o Tautoga!!!
I taimi faigata ua o’o iai le lalolagi, ua tuu faamalosi mai tulafono i le mataupu o tui mo le coviti, e aunoa ma le aloa’ia o le . filifiliga malie a le tagata-nuu, ma ua faateteleina. E faapei o le aso 21 o Ianuari, 2022, sa faailoa mai ai seisi i’uga fono a le TASK FORCE i a latou fono masani o aso Lua uma, i luga o le Samoa News. Faimai, ua iai nei ni tui ua uma ona osia mo fanau e lima tausaga ma le alu atu i luga; o lea la o le a faamalosia ai uma nei tui ia faia mo fanau e lima tausaga ma le alu atu i luga ae le’i o mai i totonu o Amerika Samoa nei!!!
Le Fono e, e le faatonua e Laupu’a, Tamafaiga. Peita’i, o fea oe?
Ma le ava tele,
Fatumalala Leuluaialii Al-Shehri
Sitiseni o Amerika Samoa
