Lau Susuga le Faatonu,
E mua’i faafetai atu i lau Susuga le Faatonu, ona o le avanoa o loo tatalaina mai e sulufa’i atu ai tagata-nuu i le fia faailoa atu o mataupu ua le malilie ai le to’atele o le atunuu, ona o uiga ese faalemalo ua tula’i mai!!!
Peita’i, ua o’u tusi atu ona o se faate’ia i folafolaga e le tusa ai ma tulafono faavae ole malo o Amerika Samoa! I le aso 12 o Ianuari, 2022, sa taua’ao atu ai se tusi mai le Susuga a le Kovana o Lemanu i le Fofoga o le Maota ole Fale Maualalo o le Fono ia Talavou Ale.
O lena tusi ua saunoa mai ai le Kovana, o tusitusiga poo imeli uma a tagata-nuu e tusi atu i o latou faipule, ia lafo atu i Lona Ofisa, ae aua ne’i toe alu i le Fono!!!
Faamolemole lava, o fea le maga o le tusi faavae o le Tulafono o Amerika Samoa e faataga ai le Kovana, e taofi ai le aia a le tagata palota e fesoota’i ma lona faipule? Se mea ina a uiga ese!
Ua ou faaalia nei folafolaga ona e le tatau, ma e fouvale i leTa’iala poo le Tulafono Faavae o le laueleele, a’o le Constitution. E tatau la ona vaai toto’a iai le Judicial i nei mea ua aliali mai.
Ia tatou nofo uta I le taua o lenei Faavae; o le toto ma le malosi o tatou tuaa o loo taatitia mai i ti’a sa, na masa’a mo lo tatou sa’olotoga. O le toto e ola, o loo alaga mai i le eleele, ia fai lo tatou tiute tausi i measina a lo tatou atunuu, i na ia tatou ola faautauta iai ma teu lelei lo tatou mamalu, ae maise lo tatou ola sa’oloto.
Lau Susuga le Kovana, e leai lava se upu a se tagata, e a’afia ai ma lau Susuga le Kovana, tulou, poo se tala e sili atu i luga o le Upu faamau a le Tulafono poo le Constitution a le malo o Amerika Samoa, le Ta’iala o le Malo.
I le ma lea, na fafau le Tulafono e auaunaina tagata-nuu po’o sitiseni o le malo. O le Tafatolu o le malo ma ona tulaga uma, e galulue mo le soifua maloloina o ona sitiseni. O le tausiaina o tagata-nuu o le aano moni lena o la outou tuatuaga. E le o sitiseni ea na palotaina outou ua ala atu ai le faamanuiaga o loo tou nonofo mai ai i le nofoaiga nei?
Mo le silafia, o le Tulafono faamau o le faavae lea o le malo o Amerika Samoa poo le Contitution. O le Tafatolu i ona vaega e tolu: le Executive, le Legislative, le Judicial, e galulue faatasi ma osi le fealofani e ta’ita’i ai le atunuu. E le mafai la ona pule faamalosi mai le Executive ma ave ese se I’OTA o le Tulafono e puipui ai le aia tatau o le sitiseni e fesoota’i ai ma lona faipule.
Ma le ava e tatau ai, e le falala fua le niu, vagana ua agi se matagi. Tulouna lava. Tatou vaai toto’a i lo tatou Ta’iala, e ta’ita’ia i tatou i manu ae le o mala, ma fai lo tatou tiute o le puipui o lo tatou sa’olotoga ne’i mamulu atu.
O le CONSTITUTION/FAAVAE e iloa ai le ala e tatau ona savavali ai; a’o seisi mea e i luga atu o le Faavae, o le solitulafono lea.
Manuia lau faasausauga Tutuila ma Manu’a, oe le penina oute tiu ai i le vasa Pasefika.
I le Suafa manumalo o Iesu Keriso, soifua.
Sitiseni o lenei Laueleele o Amerika Samoa
Fatumalala Leuluai Al-Shehri
