Lau Susuga I le Faatonu
Tulouna Samoa i ou itu e fia i lau faafofogaaga, peita’i ua le mafai ona o’u nofo ma lenei faatua’upua i lo’u nei loto. Tulouna lava. E pei ona ta’ua e Ieremia, “ONA OU FAI ATU LEA, OUTE LE TA’UTA’UINA O IA, MA OU LE TOE TAUTALA I LONA SUAFA. A’O LO’U LOTO, E PEISEA’I O SE AFI MUMU SA IAI, UA PUNITIA I O’U IVI, UA LAILOA A’U I ONOSA’I, UA OU LE MAFAIA LAVA.” Amene.
I le ava ma le migao e tatau ai, ua o’u tusi atu ma le faanoanoa tele ona o lenei mata’upu e le o aloa’ia, a’o “O LE AIA TATAU A LE TAGATA”. Mo lou silafia, a malamalama toto’a iai le aofia i lenei mata’upu, e leai se nunumi o ni faiga o tonu i soo se tulaga o le olaga. O le fesili, “O ai na faia le tagata? O ai la e pule i le tagata?
O le manulauti a lo tatou atunuu mai le amataga o le faavaeina o lenei malo, e faapea, “AMERIKA SAMOA MUAMUA LE ATUA.” O fea la o iai le faamuamua o le Atua mai ana poloaiga i le fosi o loo ua fai nei ma tutuli faamalosi ai tagata-nuu mai a latou galuega faa-le-malo ona o la latou filifiliga e le faia ni o latou tui o le koviti? E le o le Atua ea lea na faia le lagi ma le lalolagi, ma mea uma o tumu ai na avatu le filifiliga e ola ai le tagata ina ia sa’oloto ae le o le faamalosia ma le faapagotaina? Na Ia faia fo’i le tagata i lona faatusa pa’ia mai Lana filifiliga malie ma Lana pule aoao. Faimai le Kenese 1:26-27, “ONA FETALAI ANE LEA O LE ATUA, INA TATOU FAIA IA O LE TAGATA I LO TATOU FAATUSA, IA FOLIGA IA TE I TATOU; IA PULE FOI I LATOU…ONA FAIA LEA E LE ATUA O LE TAGATA I LONA FAATUSA, O LE FAATUSA O LE ATUA NA IA FAIA AI O IA; NA FAIA E IA O I LA’UA O LE TANE MA LE FAFINE.” AMENE. O ai la e fia faatu’iese i le na faia le tagata e tusa ai ma ana poloa’iga?
Na fauina e le Atua le tagata ia sa’oloto ma fai lana filifiliga tatau e tusa ma Lona finagalo, ae le o le fosi poo le faamalosi. O le eseesega lena o le tagata ola na fai e le Atua i Ona a’ao pa’ia, ma le masini fau e le tagata poo le “robot” i le gagana faaperetania. Faimai se alaga upu masani, “O lau filifiliga e te manuia ai, o lau filifiliga fo’i e te malaia ai”. Amene. O le filifiliga ua faatagaina, e iloa ai le alofa moni, ae le o le faamalosi i le fosi.
Ua uma ona tu’u ma’oti mai o Tulafono e savali ma ola mata’u ai le tagata o le Atua; faapea fo’i le faasalaga e o’o mai pe’a le tausisi ma faia Lona finagalo, i le taimi tatau ua atofaina mo Lana faamasinoga; aua e toe fo’i lava le tagata i Le na faia o ia mo lona i’uga, pe a uma lona soifua, e pei ona tusia i le Failauga 3:1 -17 e faapea, “O LE MEA MA LONA TAUSAGA I MEA UMA, ONA LAVA PO I MEA UMA LAVA I LALO O LE LAGI. O ONA PO E FANAU MAI AI, MA ONA PO E OTI AI…E FAAMASINOINA E LE ATUA LE UA AMIOTONU ATOA MA LE UA AMIO LEAGA; AUA E TA’ITASI MA ONA LAVA PO I MEA UMA MA GALUEGA UMA I LEA MEA.”
Afai la o loo ua tuu faitalia mai e le Atua le tagata e fai o lana filifiliga, o lea le uiga o le fosi ma le faamalosi lea ua fai i le pule faa-le-tagata e sosopo atu i luga o le filifiliga a le Atua Soifua? Tasi lava le mea ua faailoa mai i nei tu ma aga, ua soli vae e le tagata Lona Atua, o Le na faia o ia. E gatete lo’u nei faatauvaa pe a o’u mafaufau atu i nei tu ma aga ua o’o mai i totonu o faiga malo ma taupulega eseese i totonu o le fale fono i le taumafai e ave ese, ma taumafai e sui faavae o Tulafono e faatatau i le aia tatau a le tagata, o le na faia e le Atua i lana pule silisili.
O le Atua Soifua lava o Le e ona le pule aoao se’ia o’o i le faavavau, a ia tatou nofo uta ma iloa, e iai le taimi e tatou te tali atu ai ia te ia i galuega na tatou faia, pe lelei pe leaga.
O lea la, e matua leai leai lava se fe’au a seisi tagata ola e fai ai le pule faamalosi i luga o le aia tatau a leisi tagata ola. Tulou. E le o le mea ea lea na avatu ai le faamoemoe ma le faatuatua a tagata o le atunuu ma palotaina ni ta’ita’i e iai le tofa mamao ma le alofa, e puipui le aia tatau o le tagata, le aia e sa’oloto ai o ia i lana pule faitalia mai le Atua o mea uma, le Matai o matai, le Ta’ita’i o ta’ita’i, le Alefa, le Omeka, le Amene?
A aunoa ma le alofa i le aia tatau a le tagata, faimai le 1 Korinito 13: “AFAI OUTE TAUTALA I GAGANA A TAGATA ATOA MA AGELU, AE LEAI SO’U ALOFA, UA AVEA A’U MA ‘APA MEMEA TAALILI, POO SE SUMEPALO TAGITAGI.” Amene. Soifua ona o Iesu Keriso amene.
Fatumalala Leulua’iali’i Al-Shehri
Alataua-Lua mai le nuu o Nua&Seetaga.
