Ua u i luga le si’usi’u ae u i lalo le ulu

Lau Susuga le Faatonu,

I le ava ma le migao e tatau ai, ua o’u tusi atu i se lagona matuia, ona o se faanoanoaga tele i le vaega a le tatou Falema’i o loo puipuiina le soifua lautele o le tatou atunuu o Amerika Samoa, a’o le Department of Health poo le (DOH), ma le latou ‘au vaega foma’i o loo tau a’aoina tui o lenei faama’i o le Koviti 19 i tulaga uiga ese ma le mata’utia!

Sa o’u ‘au ai i se fono na faia i le a’oga a le lotu Papatiso o le Manumalo, a lenei vaega a le tatou Falema’i i o latou tiute lautele. I lea fono, sa faatasi ai nisi o foma’i a le DOH, e talatala le taua ma le lelei o lenei tui o le koviti, ma ua tatau ona faataunuu loa i le aso e soso’o ai, e amata mai i fanau iti e lima tausaga ma alu atu i luga; na faataunuu lava nei fuafuaga i le aso na soso’o ai.

Sa saunoa le Susuga o le Foma’i ia Tufa ole DOH, le o loo ta’ita’ia le faia o le tui lea o le Koviti, e lelei tele lenei tui ma e leai se afaina ua o’o i e ua uma ona tui. Peita’i i totonu o le latou laupepa na faasolo mai ia i matou, o loo faamatala mai ai le lisi o tulaga le mautinoa ua molia mai e ta’ua o “adverse effect” a o’u faasamoaina, o ni tulaga le lelei e tauau ina afaina I lenei tui ole Koviti.

O nisi o “adverse effect” po’o tulaga e tauau ina tupu pe a taliaina lenei tui na ta’ua: o le oso lea o le fiva i luga, o le niniva pe o le tiga o le ulu, faapea le vaivai ma le tiga o le fatu, ma isi mau ma’i. Sa o’u fesiligia nei tulaga, “Afai la, o nei tui e tauau ina afaina ai le fanau, o ai se matua le alofa e tui lona alo i se tui e tauau ina mama’i ai le fanau, i nei tulaga matuia ua tusia mai? E leai so’u tusi foma’i pe o a’u o se sainitisi, ae e iai le tomai mai lo’u Atua e ta’ua o le “Common Sense” po’o le poto lautele, e fetu’una’i ai manatu e filifili ai le mea e tatau ona fai.

O lea la e le matua “make sense” nei faaupuga, ina ia talitonu atu ai se e iai le faautaga loloto i se lelei mo le fanau faapea le soifua lautele o tagata nuu.” I le ma lea, afai o nei tui e tatau, o lea le mea ua faatosina ai tagata i le foa’i atu o tupe e ta’I $100.00? Talu na o’u ola mai, tulou, e leai se mea faapenei na faia i le talaaga o tuiga o fanau ma tagata mai le amataga!

I le loto maualalo lava, faapea ai le le leai o ni statistics e faamaoinia ai le lelei o lenei tui mai le latou potu su’esu’e poo se laboratory, e faamausali ai le aoga o lenei tui. Sa o’u fesiligiaina i seisi o se latou fono muamua na faia i le maota o le DYWA, e tusa ai ma le taimi umi o lenei tulaga o le koviti 19 sa osofai’ia ai lo tatou laueleele mai le masina o Fepuari i le tausaga 2020 se’ia oo mai i le taimi nei, o lenei ua ova ma le tausaga ma le ‘afa, ae leai ni faamaumauga poo ni data e faamatala ai le tulaga o lenei faama’i pei ona osofa’ia ai i tatou faapea le loaloa o atunuu o le lalolagi atoa!

O nisi o vaaiga le tausaafia i lea fono, na faate’ia ai le lautele i ni ta’ifau lapopo’a sa nonoa i le sitepu e ulufale atu ai i totonu o lea fono, e faaaoga i le puipuiina o lotoa osofa’ia e ta’ua o pitbulls, ae tolu le aofa’i o nei meaola mata’utia le lapopo’a, maualuluga ma le masomasoa na faamau i ni filifili i autafa o le mea na feoa’i ai le fanau iti ma matua, se’i tulou. O se vaaiga ofoofogia ia te a’u pe faapefea ona faatagaina nei tulaga, a’o faatasi ai le fanau iti ma le mamalu o matua. Talu mai ona o’u ola tulou, oute le’i ‘au ai i ni fono faapea mo le fanau iti i atunuu i fafo, ua na’o iinei lava i Amerika Samoa!

O seisi faanoanoaga tele, ina ua tula’i le tama’ita’i foma’i ia Dr. Amoa i lana saunoaga, sa faaali mai ai lona fiafia i se alo e 14 tausaga lea sa fai lona tui i lana lava pule, ae ua latou tete’eina le tama o lenei atalii i le faatu’iese e tui lona atalii. O le matuia o lenei mata’upu, ua nofo le tamaitiiti ma saini le igoa o lona tama, ae ua talia lenei tulaga e le Susuga a Dr. Amoa ma le latou vaega.

Se solitulafono tele o lenei filifiliga! E faapefea ona aloa’ia le mana’o o le tamaititi ma solia le faatonuga a le tama i lona saini faamalosia o le suafa o lona tama? Lau susuga le foma’i o le DOH, tulou lava e ta te le tutusa ona e leai so’u tikeri foma’i, ae peita’i o lo’u lea tikeri taatele o le “Common Sense”, e fesiligiaina ai mea uma o loo outou saunoa ma totogi ai tagata i tupe. E le gata I lea, o lo outou faatagaina lea o le tamaititi e soli a le matua! Ua matua le fetaui lo outou sosopo i afioga pa’ia a le Atua o loo ta’ua i le Esoto faimai, “IA E AVA I LOU TAMA MA LOU TINA, INA IA FAALEVALEVA AI OU ASO I LE NUU O LE A FOAIINA MAI E LOU ATUA IA TE OE.” Amene. (Esoto 20:12)

Ae faapefea Tulafono faa le malo lautele lea e le faataga ai se tagata la’ititi ona fai filifiliga pulea i lalo ma le 18 o tausaga? Ae maise ai le saini le tatau o le saini a seisi tagata e le o sona igoa? O le solitulafono lenei mea, ae ua sapasapaia mai e foma’i a le DOH pei ona saunoa Dr. Amoa!

O le mea lea oute ta’ua ua u i luga le si’usi’u ae u i lalo o le ulu, po’o le tala masani e faapea, “ua maua maua vae, ma lima, ona leiloa lea o le mea na sau mai ai.” Fai atu ai fo’i i se faanoanoaga tele ua iai le fuata’ina o nei aso ma fautuaga le taupulea ma le le sa’o ua tatau ai ona fai iai se i’uga tatau o nei amioga matuia.

Afai ua iai se upu ua sala, faamagalo mai i lau faafofogaaga, e poto lava le tautai, ae se lana atu i ama. Peita’I, e le toto’e ma malomaloa fua le toa, vagana ua o’o i lona taimi tatau ua atofaina e lona Atua e fai ai o lona tiute i le tafa o ata, ae le’i o’o mai le taeao o isi matuia tetele. Manu teleina lo’u atunuu pele Samoa i ou tafafa e fia.

Soifua ona o Iesu amene.

Fatumalala Leuluaialii Al-Shehri
Nua&Seetaga,
Itumalo Alataua, Falelima i Sisifo
Tutuila.